Daga Ibrahim Muhammad, Kano
A yammacin ranar Talata ne tsohon Kwamishinan Sufuri na jihar Kano kuma dan takar majalisar wakilai na karamar hukumar Dala, Hon. Ibrahim Namadi Dala, ya raba babura ga magoya bayansa.
Rabon baburan na daga cikin kokarin da yake yi na tallafa wa mabiyansa domin inganta rayuwarsu da bunkasa harkokin tattalin arzikinsu.
Tallafin ya samu yabo daga magoya baya da abokan siyasa. Sun bayyana shi a matsayin ci gaba da kula da walwalar mabiyansa da kuma kyakkyawar niyya ta basu damar samun rayuwa mai kyau.
Wadanda suka amfana da baburan sun nuna farin cikinsu. Sun ce tallafin ya zo kan lokaci kuma zai taimaka wajen saukaka zirga-zirga da karfafa harkokin kasuwancinsu.
Daga cikin matasan da suka amfana akwai Mustapha Kakisu, Abdul’aziz M. Sani, Zangina Gwammaja da Karibu Aminu.
Al’ummar karamar hukumar Dala sun kara jaddada kiran da suke yi ga Gwamnan jihar Kano, Injiniya Abba Kabir Yusuf, da ya mayar da Hon. Namadi cikin majalisar zartaswar jihar. Suna ganin hakan zai karfafa kokarin da yake yi na tallafawa cigaban al’ummar Kano da kare muradun gwamnati.






