Saleh Aliyu
Daga Ibrahim Muhammad Kano
Wani Matashi jigo a jam’iyyar NDC Kwankwasiyya daga karamar hukumar Bebeji, Abba Umar Tiga, ya ce tun da aka koma tsarin Damakwaradiyya yankin Kano ta Kudu bai samu wakilci na gari a Majalisar Dattawa ba.
Ya ce kowanne Sanata da ya zo ya tafi, har zuwa Sanata Kabiru Ibrahim Gaya wanda shi yafi kowa dadewa yayi shekaru 16 a matsayin Sanatan yankin, amma babu wani aiki na cigaba da al’ummar Kano ta Kudu za su yi alfahari da shi kawo.
Abba Umar Tiga ya ce, saboda haka ne a shekarar 2023 suka hadu suka sauya shi, suka kawo Sanata Kawu Sumaila da kyakkyawan zato a kansa, amma abin da ake tsammani ba haka aka gani ba.
“Duk mai son cigaban Kano ta Kudu a wannan karo na zaben 2027, dole ne mu hade kanmu waje daya mu tsaya mu sauya wakilci domin samun kyakkyawar wakilci da zai amfanar da dukkan al’ummar yankin,” in ji shi.
Ya kara da cewa yankin Kano ta Kudu na fama da dimbin kalubale duk da kasancewarsa yanki mafi yawan mazabu a duk fadin kasar nan. A cewarsa, da ace ana bin tsarin yawan mazabu ne wajen zaben Shugaban Majalisar Dattawa, to daga yankin ne ya kamata a rika samu, amma sai gashi manyan matsaloli na damun yankin kuma basa amfanar abin da ya kamata.
Abba Umar Tiga ya yi kira ga al’ummar Kano ta Kudu su fito su yi aiki tukuru domin kawo sauyi domin suna da kyakkyawan fata akan Dakta Alkasim Ibrahim Batayya idan ya zama sanata , saboda irin ayyukan alheri da yake yi a baya da kuma yanzu, duk da cewa baya rike da wani mukami na siyasa.
A cewarsa, Dakta Batayya kamar likita ne da ya san ciwo ya kuma san maganin da zai rubuta domin samun waraka. Idan al’ummar Kano ta Kudu suka zabe shi a matsayin Sanata a zaben 2027 karkashin jam’iyyar NDC, tabbas za su samu mafita, domin zai hada kai da dukkan masu ruwa da tsaki masu kishin cigaban yankin domin fitar da Kano ta Kudu daga matsalolin da ke damunta.
