Saleh Aliyu
Daga Ibrahim Muhammad
Ƙungiyar Lauyoyi ta Ƙasa (NBA), reshen Ungogo jihar Kano, ƙarƙashin jagorancin Ahmad Abubakar Gwadabe ya yaba da gode wa Gwamnan Jihar Kano, Alhaji Abba Kabir Yusuf kan ɗaukar mataki na gaggawa da kafa kwamitin bincike domin duba zargin da ake yi cewa wani jami’in gwamnati bisa tsayawa karɓar belin wani da ake zargi da safarar miyagun ƙwayoyi da ke fuskantar shari’a a gaban Babbar Kotun Tarayya da ke Kano.
Wannan na ƙunshe ne a cikin wata takarda da ƙungiyar ta fitar ga manema labarai da ke da sa hannun shugaban ta Batista Ahmad Abubakar Gwadabe.
Ƙungiyar lauyoyin reshen Ungogo ta kalli lamari da matuƙar damuwa, kasancewar laifukan da suka shafi safarar miyagun ƙwayoyi suna da nasaba da hauhawar matsalolin tsaro, taɓarɓarewar tarbiyyar matasa da kuma yawaitar munanan ɗabi’u a cikin al’umma.
Laifukan da suka shafi miyagun ƙwayoyi na jawo haifar da tashin hankali, barazana ga tsaro daga zaman lafiyar al’umma da lalata ginshiƙin kyawawan ɗabi’u.
Sun bayyana cewa duk suna yabawa da kafa kwamitin bincike, suna kuma kira ga gwamnatin jihar da ta tabbatar da cewa rahoton kwamitin ya kasance a bayyane don tabbatar da gaskiya da riƙon amana, suna kuma buƙatar mambobin kwamitin da su gudanar da aikinsu cikin gaskiya da adalci da rashin son zuciya duk da cewa ba a bayyanawa jama’a sharuɗɗan aikinsu ba.
Batista Ahmad Abubakar Gwadabe shugaban lauyoyin ya ce reshen Ungogo na nan daram wajen tsayawa don ganin adalci, gaskiya a cikin mulki, da kuma kare muradun al’umma za su cigaba da mara baya ga dukkan wani yunƙuri da ke neman kare doka da oda da kuma kare jihar Kano daga mummunan tasirin shan miyagun ƙwayoyi.
Gazali Haruna
