Saleh Aliyu
Daga Ibrahim Muhammad
Gwamnatin jihar Kano ta gabatar da muhimman buƙatu ga Kwamitin Majalisar Wakilai na gyaran kundin tsarin mulkin ƙasa, ciki har da buƙatar ƙirƙirar sabuwar jiha daga cikin Kano.
Gwamna Abba Kabir Yusuf, ta bakin mataimakinsa, Injiniya Aminu Abdussalam Gwarzo, ya gabatar da buƙatun ne a yayin taron jin ra’ayin jama’a na yankin Arewa maso Yamma da ya gudana a Kaduna.
A cewa gwamnatin Kano, lokaci ya yi da za a sake fasalin tsarin mulki don bai wa jihohi damar bunƙasa bisa sahihin tushe. Daga cikin buƙatun da aka gabatar akwai:
Kirkiro sabuwar jiha daga cikin Kano, don rage cunkoso da ƙarfafa wakilci.
Ƙara yawan ƙananan hukumomi a jihar Kano tare da tabbatar da cikakken ‘yancinsu.
Samar da ‘yan sandan jihohi, domin inganta tsaro da ingantaccen amsa ga matsalolin tsaro na cikin gida.
Sake fasalin rabon tattalin arziƙin ƙasa, ta yadda za a samu daidaito tsakanin jihohi wajen amfani da albarkatun ƙasa da kuɗaɗen shiga.
Gwamnan ya jaddada cewa buƙatun sun fito ne daga muradun al’ummar Kano, kuma gwamnati na da ƙwarin gwiwar cewa Majalisar za ta ɗauki matakin da ya dace domin tabbatar da sauye-sauyen da ake nema.
Gazali Haruna
