Saleh Aliyu
Daga Ibrahim Muhammad, Kano
Al’ummar yankin Kano ta Arewa sun gudanar da wani gangami domin nuna buƙatarsu ga Injiniya Abdullahi Tijjani Muhammad Gwarzo da ya fito takarar sanatan yankin a zaɓen 2027 mai zuwa.
An bayyana cewa gangamin ya biyo bayan kiraye-kirayen da al’ummomin yankin ke yi ga tsohon ƙaramin ministan gidaje da kuma tsohon mataimakin gwamnan jihar Kano, inda suke roƙon sa da ya amsa wannan kira nasu.
Shugaban kwamitin kiraye-kirayen, Hon. Magaji Shehu Lambu, wanda tsohon shugaban ma’aikata ne na tsohon ministan gidaje da raya karkara na ƙasa, ya bayyana haka ne yayin gangamin da aka gudanar a gidan Mambayya ranar Talata.
Ya ce gangamin ya samo asali ne daga yadda jama’a ke ci gaba da matsa musu a duk inda suka haɗu da su, suna roƙon a kira Gwarzo ya fito takara.
A cewarsa, kiran ya fara ne daga matakin daidaiku har zuwa ƙungiyoyi da gungu-gungun jama’a, lamarin da ya sa suka ga dacewar fito da shi fili domin duniya ta sani.
Hon. Lambu ya ƙara da cewa siyasa dama demokuraɗiyya ce, kuma kowa na da damar neman kowanne irin muƙami a Nijeriya.
Ya ce wannan ba shi ne karon farko da ake kira ga Gwarzo ya fito takara ba, domin a kalla sau uku ana yin irin wannan kira, sai dai a baya ana roƙonsa ya haƙura duk da buƙatar da jama’a ke da ita a kansa.
Ya bayyana cewa a wannan karon, al’ummar yankin na da ƙudurin ganin ya amsa kiran domin ya zama dan takara wanda za su mara wa baya ya samu nasara a zaben 2027 da yardar Allah.
Lambu ya ce al’ummar Kano ta Arewa da ma jihar Kano gaba ɗaya sun san Gwarzo a matsayin ɗan siyasa mai kishin al’umma da kyakkyawar mu’amala da jama’a, tun daga halartar bukukuwa kamar suna, aure, jana’iza, ta’aziyya da kuma duba marasa lafiya, abin da ya kara dankon zumunci tsakaninsa da al’umma.
Ya kuma yi nuni da cewa yankin na fuskantar matsaloli da dama, ciki har da lalacewar hanyar Kabuga zuwa Dayi wadda ta shafe kusan shekaru takwas ana ƙoƙarin gyaranta ba tare da samun cikakken nasara ba.
Sai dai ya ce jama’a na da kyakkyawan fata cewa idan Gwarzo ya samu dama, zai kawo sauyi, la’akari da ayyukan da ya gudanar a lokacin da yake riƙe da muƙamin minista, duk da ƙanƙanin lokacin da ya yi.
A cewarsa, daga cikin ayyukan akwai gina gidaje 500 a garin Lambu da kuma wasu 1,500 da ake ginawa a Janguza, tare da samar da kananan tituna da fitilun hasken rana da sauran ayyukan raya kasa.
Hon. Lambu ya ce gangamin ya hada mahalarta daga dukkan ƙananan hukumomin Kano ta Arewa, maza da mata, matasa da dattawa, wadanda suka bayyana aniyarsu ta marawa Gwarzo baya domin ya fito takarar sanata a zaɓen 2027.
