Saleh Aliyu
Daga Ibrahim Muhammad, Kano
Gidauniyar NNPCL, reshen ayyukan jin ƙai na NNPC Ltd, ta ƙaddamar da sabuwar na’urar binciken cututtuka ta zamani mai ƙarfin 1.5 Tesla MRI Scan da aka girka a Asibitin Kashi na Ƙasa da ke Dala, Kano, domin inganta binciken cututtuka cikin sauri da sahihanci.
An bayyana cewa tallafin na daga cikin ƙoƙarin kamfanin na bunƙasa harkokin lafiya da sauƙaƙa ayyukan likitanci a faɗin Najeriya. Ana sa ran na’urar za ta taimaka wajen gano da kuma kula da cututtukan da suka shafi ƙashi, ƙwaƙwalwa, tsokoki, raunuka da kuma wasu matsalolin lafiyar mata.
Da take jawabi a wajen bikin ƙaddamar da na’urar da aka gudanar a ranar Alhamis, Babbar Daraktar Gidauniyar NNPCL, Mrs Emmanuella Arukwe, wadda ta wakilci Babban Daraktan NNPC Ltd, ta ce tallafin na cikin manufar kamfanin ta bayar da gudummawa mai ɗorewa wajen bunƙasa harkar lafiya a ƙasar nan.
Ta ce kamfanin na da burin tabbatar da cewa zuba jarin da yake yi a ayyukan jin ƙai yana haifar da sauyi mai ma’ana da kuma amfanar al’ummomin da yake yi wa hidima.
Ita ma Darakta Zartarwa ta Gidauniyar NNPCL, Mrs Rose Okonkwo, wadda ta wakilci Mataimakin Shugaban NNPC Ltd, ta ce kamfanin ya wuce aikin hako mai kawai, inda yake taka muhimmiyar rawa wajen inganta rayuwar ’yan Nijeriya.
A cewarta, ƙaddamar da na’urar MRI a Asibitin Ƙashi na Dala wata shaida ce ta ƙudirin NNPC Ltd na samar da ci gaba mai ɗorewa, musamman a fannin lafiya, domin amfanin al’ummomin da ke da ƙarancin damar samun ingantattun ayyukan kiwon lafiya.
Ta ƙara da cewa na’urar za ta taimaka wajen ƙarfafa ayyukan lafiya ga al’ummar Kano da yankin Arewa maso Yamma baki ɗaya, da kuma sauran marasa lafiya da ke neman kulawa a asibitin.
A nasa jawabin, Kwamishinan Lafiya na jihar Kano, Alhaji Abubakar Labaran Yusuf, wanda ya wakilci Gwamna Abba Kabir Yusuf, ya yaba wa Gidauniyar NNPCL bisa wannan tallafi, wanda ya bayyana a matsayin wani gagarumin ci gaba wajen inganta ayyukan gano cututtuka da kuma samar da magani cikin lokaci.
Shi ma Shugaban Asibitin Ƙashi na Dala, Dr. Isa Nurudeen, ya gode wa NNPC Ltd kan tallafin, yana mai cewa zai taimaka matuƙa wajen inganta ayyukan asibitin da kuma hidimomin da yake bayarwa ga marasa lafiya.
Bikin ya samu halartar manyan jami’an NNPCL, ma’aikatan asibitin, jami’an gwamnati, likitoci, sarakunan gargajiya da sauran masu ruwa da tsaki a harkar lafiya.
Gazali Haruna
