Saleh Aliyu
Daga Ibrahim Muhammad Kano
Mai Kula da Shirin YEIDEP’s Financial Partners na Jihar Yobe, Hon. Hassan Kaku Hassan, ya bayyana cewa suna sa ran shirin zai samu karɓuwa sosai a tsakanin matasan jihar.
Ya ce babban burin shirin shi ne taimaka wa matasa su samu sana’o’i da hanyoyin dogaro da su kansu, domin rage rashin aikin yi da kuma hana su faɗawa cikin munanan halaye.
Hon. Hassan ya bayyana hakan ne yayin taron ƙaddamar da shirin a Jihar Kano, inda ya ce shirin zai samar da tallafi kai tsaye ga waɗanda suka cika sharuɗɗan cin gajiyarsa.
Ya ce duk wanda ya buɗe asusun banki kuma aka shigar da bayanansa cikin tsarin, tallafin da aka ware masa zai shiga asusunsa kai tsaye. “Duk wanda ya buɗe asusun ajiya na banki kuma aka saka lambar sa cikin tsarin, duk lokacin da aka bayar da tallafi, zai shiga cikin asusunsa kai tsaye,” in ji shi.
Ya ƙara da cewa shirin zai kuma ba matasa horo kan sana’o’i daban-daban domin su samu damar dogaro da kansu.
A cewarsa, rashin ilimi da rashin aikin yi na daga cikin abubuwan da ke jefa wasu matasa cikin shaye-shaye da sauran munanan ayyuka.
Hon. Hassan ya ce za su ci gaba da wayar da kan matasan Yobe kan muhimmancin shirin da kuma hanyoyin da za su bi domin cin gajiyarsa. Ya ce suna da kyakkyawan fata cewa shirin zai samu karɓuwa sosai a jihar.
A ƙarshe, ya yaba da yadda shirin ke gudana a Jihar Kano ƙarƙashin jagorancin Shugaban Shirin na Arewa, Hon. Sani Musa Danja, Mai Ba Gwamnan Kano Shawara kan Harkokin Matasa da Wasanni, bisa irin gudunmawar da yake bayarwa wajen ganin shirin ya yi nasara.
Ya kuma yi kira ga waɗanda za su amfana da tallafin da su yi amfani da shi yadda ya kamata, domin ya amfani kansu, ’yan uwansu, makwabta da kuma al’umma baki ɗaya.
Gazali Haruna
