Saleh Aliyu
Daga Ibrahim Muhammad Kano
Sakamakon irin dimbin alheri da gudummawar da dan takarar majalisar tarayya na PDP, Hon. Alhaji Abubakar Ibrahim Maina, ke bai wa al’ummar karamar hukumar Tarauni, al’ummar ta sanya shi a gaba ya nemi takarar majalisar tarayya domin samun damar da zai kara hidimta musu.
Sakataren jam’iyyar PDP na mazabar Hotoro NNPC, kuma Mataimaki na Musamman ga dan takarar, Isma’ila Salihu, ne ya bayyana hakan yayin da yake zantawa da ‘yan jarida.
Ya ce suna da kungiyoyi a Tarauni da ake taimakon marayu da taimakon al’umma na yau da gobe, da kuma kwamitoci da suke gudanar da tsaftace unguwanni. Akwai kuma dandamali na zauren sulhu da ake warware matsalolin da suka shafi iyaye da yara, makota, matsalar bashi da samar da masalaha, wanda dan takarar ke bayar da gagarumar gudummawa wajen gudanar da su.
Isma’ila Salihu ya ce abin da ya sa suka shiga jam’iyyar PDP, sun yi duba da abubuwa guda biyu ne. Na farko, idan aka duba irin halin da ake ciki yanzu, a zamanin PDP da ta yi mulki har ta gama, ba a taba sayen buhun shinkafa kan Naira 8,000 ba, sai dai kasa da Naira 7,000, amma yanzu ta gagari al’umma.
Ya yi nuni da cewa jam’iyyar PDP ce duk wanda ya zama wani abu a siyasa a Najeriya ya bi ta ya zama, sai dai wani abu ne ya sa ya fita ya bar ta. Don haka su ba za su bar PDP ba, domin ita ce ta yi abubuwan da ‘yan Najeriya suka mora, kuma jam’iyya ce da take yi musu sauki wajen tallatawa saboda kyawawan manufofinta, domin duk wanda ya tuna bara bai ji dadin bana ba.
Ya ce su a karamar hukumar Tarauni ba su gamsu da yadda wakilan su ke wakiltar su a jiha da tarayya ba. Mutane na kuka kan rashin kayayyakin more rayuwa, duk da akwai damarmaki da ya kamata wakilan su su kawo, ko da na ayyukan mazabu ne da ake ware musu, da za su aiwatar da su a Tarauni, wanda da su kadai Tarauni ta wuce matsayin da take a yanzu.
Isma’il Salihu ya ce idan aka duba yadda abubuwa suke gudana, idan suka bi tsarin tafiyar siyasar Ubangida, ba za su kai ga abin da suke da bukata ba na yi wa al’umma hidima, duba da yadda suke son kawo sauyi a wannan lokaci.
Don haka ya yi kira ga al’ummar karamar hukumar Tarauni su zabi cancanta, wanda za su tsaya a gaban Ubangiji su fadi dalilin da ya sa suka zabe shi, domin duk abin da za ka yi, ka duba cancanta shine mafita.
“Mu muna da yakinin cewa Alhaji Abubakar Ibrahim Maina shi ne mafita, kuma muna da kyakkyawan fata a kansa saboda yadda yake taimakawa cigaban Tarauni da dukiyarsa. Idan ya zama wakilin al’ummar Tarauni a majalisa, zai kawo cigaban da ya kamata,” in ji shi.
