Saleh Aliyu
Daga Ibrahim Muhammad Kano
’Yan’uwa da makusantan sabon Sarkin Zabarmawan Kano, sun bayyana matuƙar farin cikinsu da naɗin Alhaji Barhama Hussaini Yahaya a matsayin Sarkin Zabarmawa na farko a Jihar Kano.
Ɗaya daga cikin ’yan’uwan Sarkin, Alhaji Mustapha Abdulrazak, ya bayyana cewa suna matuƙar godiya ga Allah bisa wannan naɗi, inda ya ce Alhaji Barhama mutum ne mai karamci da kyawawan halaye, wanda ya cancanci wannan matsayi duba da irin gudunmawar da yake bayarwa ga al’umma.
Ya ce sabon Sarkin Zabarmawan Kano mutum ne mai kula da ’yan’uwa da dangi, mai tausayi da jin ƙan al’umma, halaye da aka shaida a kansa tsawon lokaci.
Alhaji Mustapha Abdulrazak ya ƙara da cewa a matsayinsu na ’yan’uwa, za su ci gaba da ba shi cikakken goyon baya domin kare martabar sarautar da aka ɗora masa, tare da yi masa fatan alheri a sabon muƙamin nasa.
Ya kuma gode wa mai martaba Sarkin Kano, Khalifa Muhammad Sanusi, bisa karamci da girmamawar da ya nuna wa Zabarmawa ta hanyar naɗa Alhaji Barhama a matsayin Sarkin Zabarmawa, inda ya ce hakan ya nuna ƙima da mutunta Zabarmawa da ke zaune tare da al’ummar Kano tun kaka da kakanni.
A nasa jawabin, ɗaya daga cikin shugabannin Zabarmawa da ya halarci bikin, Alhaji Muktar Mika’il Minna, shugaban Ƙungiyar Cigaban Zabarmawa ta Jihar Neja, kuma mataimakin shugaban Zabarmawa Development Association (ZAGA) na ƙasa, ya ce wannan naɗi ya nuna amincewa da nagartar sabon sarkin.
Ya ce babu abin da Zabarmawa za su ce face godiya ga Sarkin Kano da al’ummar Kano baki ɗaya bisa soyayya, yarda da kuma girmamawar da suka nuna musu.
Alhaji Muktar Mika’il Minna ya yi fatan al’ummar Zabarmawa za su bai wa Sarkin Zabarmawan Kano cikakken haɗin kai, goyon baya, shawarwari da addu’o’i, domin Allah ya ba shi ikon sauke nauyin da aka ɗora masa yadda ya dace.
Gazali Haruna
