Saleh Aliyu
Daga Ibrahim Muhammad, Kano
Wani jigo a jam’iyyar APC, Sani Babba, ya bayyana gamsuwarsa da ayyukan raya ƙasa da kuma kyakkyawan wakilcin da ɗan Majalisar Dokoki ta Jihar Kano mai wakiltar ƙaramar Hukumar Fagge, Hon. Tukur Muhammad, ke yi.
Sani Babba ya ce ɗan majalisar ya samar da makarantu a yankin, ciki har da wata makaranta da aka gina a Dandalin Fagge, da kuma wani babban gida kusa da Gidan Sarkin Aska da ke Rijiyar Lemo, wanda ya mayar da shi makaranta da za a buɗe nan gaba kaɗan.
Ya ƙara da cewa ɗan majalisar ya gina hanyoyi, ya gyara masallatai, tare da gyara da kuma haƙa rijiyoyin burtsatse a wurare daban-daban na ƙaramar Hukumar Fagge.
A cewarsa, “Hon. Tukur Muhammad mutum ne mai sauƙin kai, mai mutunta jama’a da sauraron koke-kokensu, yana kuma ba matasa kulawa ta musamman. Ya ce dan majalisar na tallafawa iyaye mata da jarin sana’o’i, duk da cewa ba ya son a riƙa yayata irin tallafin da yake bayarwa.”
Sani Babba ya ce kasancewar gwamnatin Kano ta shigo ta tarar da su a jam’iyyar APC, tare da gamsuwarsu da ayyukan Gwamna Abba Kabir Yusuf, yanzu an zama ɗaya, lamarin da ya sa suke yaɗa manufofin gwamnatin a faɗin yankin.
Ya ce idan suka ga wani wuri da ake buƙatar aiki a Fagge, sukan sanar da Shugaban ƙaramar Hukumar Fagge, Hon. Salisu Usman Masu, wanda yake ɗaukar matakin aiwatar da ayyukan cikin gaggawa. “Saboda haka, za mu ci gaba da ba da goyon baya domin tabbatar da nasarar jam’iyyar APC a kowane mataki,” in ji shi.
