Saleh Aliyu
Daga Ibrahim Muhammad Kano
Dan takarar Majalisar Jiha na Dawakin Tofa a jam’iyyar NDC, Hon. Ibrahim S.B. Maisallah, ya bayyana taron da kungiyar Dawakin Tofa Academic Forum ta shirya na karrama ‘yan Dawakin Tofa da suka bayar da gagarumar gudummawa ga kasa baki daya, ba Dawakin Tofa kadai ba, a matsayin abin koyi da ke nuna irin gudummawar da magabatan yankin suka bayar har suka bar duniya.
Da yake zantawa da ‘yan jarida a yayin taron, Hon. Ibrahim S.B. Maisallah ya ce
“Wannan irin taro ba wai don tunawa da su kadai ba ne, ana nufin mu tuna da su tare da dora kan abubuwan alheri da suka yi. Yadda aka taru a wajen taron, tun daga matasa, malamai, ‘yan siyasa, ‘yan kasuwa da farfesoshi, ya nuna cewa Dawakin Tofa gari ne mai girma da ma Najeriya gaba daya za ta iya alfahari da da ita”
Hon. Maisallah ya yi kira ga al’ummar Dawakin Tofa da su ci gaba da hada kai, duk da banbancin ra’ayin siyasa da sana’o’i.
“Ko da yake kowa na da nasa tsarin siyasa, wasu ‘yan kasuwa ne, wasu malamai ne, wasu manoma ne, amma yana da kyau mu hada kai, mu ajiye siyasa a gefe, mu hada karfi da karfe domin taimakon al’umma da kuma dorawa kan irin kyawawan ayyuka da magabata suka yi, wanda har ya kai ga shirya irin wannan taro na karrama su, wanda ya zama abin alfahari ga iyalansu da al’ummar Dawakin Tofa baki daya,” in ji shi.
Gazali Haruna
