Saleh Aliyu
Daga Ibrahim Muhammad, Kano
Dakta Muhammed Musa Zango, wanda aka fi sani da Fatah, ya ayyana aniyarsa ta tsayawa takarar Sanatan Kano ta Tsakiya a ƙarƙashin jam’iyyar APC gabanin babban zaɓen 2027.
Fatah ya bayyana ƙudirinsa ne a wani taro da aka gudanar a Kano ranar Asabar, wanda ya samu halartar magoya bayansa da masu ruwa da tsaki a harkokin siyasa.
Da yake jawabi a wajen taron, ya ce ya yanke shawarar shiga takarar ne bayan dogon nazari da kuma gogewar da ya samu wajen hulɗa da al’umma tun daga matakin ƙasa.
Ya ƙara da cewa tun a shekarar 2003 yake tallafa wa ƙananan ‘yan kasuwa a yankinsa da jari domin inganta kasuwanci da ƙarfafa dogaro da kai.
“Wannan aiki na tsawon shekaru ya ƙara mini ƙwarin gwiwar cewa wakilci nagari na iya kawo sauyi mai ma’ana. Wakilci nagari shi ne wanda ke sauraron buƙatun talakawa tare da mayar da su cikin dokoki da tsare-tsare da za su inganta rayuwarsu,” in ji shi.
MANUFOFI BAKWAI
Ɗan takarar ya gabatar da muhimman manufofi guda bakwai da ya ce za su zama ginshiƙin aikinsa idan ya samu nasara:
Na farko, ya ce zai tabbatar da wakilci mai inganci ta hanyar gabatar da ƙudurori da dokoki da za su amfani al’ummar Kano kai tsaye.
Na biyu, ya yi alƙawarin bunƙasa noma ta hanyar tallafawa manoma da kayan aiki domin ƙara yawan amfanin gona da inganta tattalin arziki.
Na uku, ya jaddada ƙudirinsa na inganta harkar kiwon lafiya ta hanyar gyara asibitoci da sauƙaƙa samun kulawar lafiya ga al’umma.
Na hudu, ya bayyana cewa zai mayar da hankali kan gyara da gina hanyoyi da sauran ababen more rayuwa domin saukaka zirga-zirga da harkokin kasuwanci.
Na biyar, ya ce zai yi aiki domin ganin an kammala aikin bututun iskar gas na Ajaokuta–Kaduna–Kano (AKK) domin bunƙasa masana’antu.
Na shida, ya yi alƙawarin samar da ruwan sha mai tsafta ga al’ummar yankin, musamman a karkara.
Na bakwai, ya bayyana ƙudirinsa na farfaɗo da masana’antar yadi ta Kano domin samar da ayyukan yi da ƙarfafa tattalin arzikin jihar.
Fatah ya kuma yi kira ga al’ummar Kano ta Tsakiya da su ba shi goyon baya, yana mai cewa zai yi aiki tuƙuru domin samar da sauyi mai ɗorewa.
“Idan aka ba ni dama, zan wakilci kowa ba tare da nuna bambanci ba. Burina shi ne ganin Kano ta Tsakiya ta samu ci gaba mai ma’ana,” in ji shi.
Ana ganin shigowar Fatah cikin takarar na ƙara zafafa fafatawar siyasa a yankin Kano ta Tsakiya, wadda ake hasashen za ta kasance ɗaya daga cikin wuraren da za a fi fafatawa mai tsanani a zaɓen 2027.
