Saleh Aliyu
Daga Ibrahim Muhammad Kano
An bayyana aure a matsayin al’amari na zaman haƙuri, inda dole ne ma’aurata su fahimci cewa akwai lokutan da rashin jituwa kan iya tasowa, amma a yi aiki da koyarwar Manzon Allah (SAW) wajen magance matsaloli.
Injiniya Bashir ne ya bayyana hakan bayan ɗaurin auren ɗansa, Sadik Bashir, da A’isha Farfesa Tijjani Hassan Darma, wanda aka gudanar a harabar Masallacin Juma’a na tsohuwar Jami’ar Bayero, a ranar Asabar.
Ya yi nuni da cewa mutuntawa ita ce ginshiƙin zamantakewar aure, yana mai jaddada cewa bai kamata a riƙa zagi a tsakanin ma’aurata ba, domin hakan na iya janyo rashin jituwa.
Ya ce idan miji ya saba zagin matarsa, wata rana za ta iya ramawa, wanda hakan zai ƙara tsananta matsalar.
Ya ƙara da cewa ya kamata a riƙa ɗaukar matakai kamar yadda Manzon Allah (SAW) ya koyar, na kaucewa mace idan ta aikata abin da ya ɓata rai, ba tare da duka ko zagi ba.
Ya ce hakan na sa mace ta yi nadama, sannan idan aka dawo sai a zauna a tattauna domin fahimtar juna da sulhu.
Injiniya Bashir ya jaddada cewa ɗorewar zamantakewar aure na samuwa ne ta hanyar haƙuri da juna, inda ya ce dole ne a rayuwa a samu lokutan farin ciki da kuma akasin haka.
Haka kuma, ya nuna damuwa kan yawaitar saki da ake samu a tsakanin ma’aurata, yana danganta hakan da sakacin iyaye, musamman a Arewacin Nijeriya, wajen tarbiyantar da ’ya’yansu kan yadda ake gudanar da zamantakewar aure.
Ya ce ya kamata iyaye su riƙa zama da ’ya’yansu su koya musu yadda za su tafiyar da rayuwar aure cikin hikima.
A ƙarshe, uban Angon ya nuna matuƙar farin ciki tare da godiya ga mutanen da suka halarci bikin aure daga wurare daban-daban, duk da tsadar sufuri da ake ciki.
Ya ce baya ga mutanen Kano, akwai waɗanda suka zo daga Katsina da garin Okene da sauran sassan ƙasar nan.
Haka kuma ya gode wa abokan aikinsa da shugabanninsu daga Jami’ar Maryam Abacha (MAUN) bisa zumuncin da suka nuna masa.
Gazali Haruna
