Saleh Aliyu
Daga Ibrahim Muhammad
Hon. Sulaiman Isah Majidadin Ɗan Malikin Zannan Kazaure, kuma mai bai wa shugaban ƙaramar hukumar Ungogo shawara a harkar noma da kiwo, ya yi kira ga masu gudanar da makarantun Islamiyya su riƙa gayyatar masu muƙamai na siyasa da sauran shugabanni wajen walimar sauka da suke yi, domin hakan zai sa su ga irin buƙatun makarantun don su riƙa tallafawa cigabansu.
Ya ce su a matsayinsu na iyaye sun zo walima ne don shaidar saukar Alƙur’ani mai girma na ‘ya’yansu da suka yi musaffa da tilawa, wasu sun haddace izu 60, wasu 30. Abin alfahari ne da jin daɗi mutum a ce ya samu ɗansa yana cikin wanda ya haddace Alƙur’ani.
“Dan haka a matsayina na uba, ina jan hankalin makarantu su riƙa gayyatar manyan mutane, musamman masu maƙaman siyasa tun daga zaɓaɓɓen shugaban ƙaramar hukumar Ungogo da ‘yan majalisu na tarayya da na jiha, domin ta nan ne idan mutum ya zo kusa da kai zai ga ta inda za su kawo gudunmawa ta cigaban makarantar,” ya tabbatar.
Ya ce da ya zo wannan walima ta sauka ya yi magana da shugaban makarantar da aka yi saukar a kan bai ga kowa daga cikin wakilai na mazaɓar Rangaza ba, duk da kuwa akwai zaɓaɓɓen Kansila da mai gafaka a yankin.
Ya ja hankalinsu a kan duk irin wannan taro su riƙa sanya ‘yan siyasa a ciki, shi ne idan sun zo sun ga wata buƙata za a shiga domin a taimaka.
Hon. Sulaiman Isah Majidadin Zannan Kazaure, wanda kuma shi ne mai bai wa shugaban ƙaramar Hukumar Ungogo shawara a kan noma da kiwo ya ce, babu abin da za su ce da makarantar sai Allah ya saka wa masu gudanar da ita da alheri, “Domin duk makarantar da za ta kula da tarbiyyar yara da karatunsu da tsaftarsu, abu ne na ajinjina musu. Yara ne za a kawo musu ‘yan ƙasa da shekaru 10, amma su ba su kulawa har in ka kalli ɗanka za ka ga ya canza daga yanayin da ka kawo shi daga gida, abin yabawa ne da jin daɗi,” ya bayyana.
