Saleh Aliyu
Daga Ibrahim Muhammad, Kano
Injiniya Aminu Aliyu Wudil, Wamban Sarkin Sudan na Kano, ya bayyana farin cikinsa bisa naɗin Alhaji Muhammad Aliyu Wudil a matsayin Sarkin Sudan na Kano, wanda Sarkin Kano, Malam Muhammad Sanusi II ya yi masa a ranar Juma’a a fadarsa.
Ya ce ɗaukakar da aka yi wa Alhaji Muhammad Aliyu Wudil daga sarautar Dokajin Kano zuwa Sarkin Sudan babban abin alfahari ne ga iyalai da al’ummar yankin baki ɗaya.
A cewarsa, yawan jama’ar da suka halarci bikin naɗin domin taya murna daga sassa daban-daban na nuna irin kyakkyawar mu’amala, halin kirki da kuma taimakon jama’a da sabon Sarkin Sudan ke da shi, wanda ya jawo masa karɓuwa a zukatan mutane.
Injiniya Aminu Aliyu Wudil ya ƙara da cewa, kamar yadda aka naɗa sabon Sarkin Sudan a shekarar 2023 a matsayin Dallatun Kano daga bisani ya zama Dokaji, yanzu kuma ya samu ƙarin ɗaukaka zuwa Sarkin Sudan, yana mai fatan Allah ya ba shi ikon gudanar da wannan sabon matsayi cikin nasara da kwanciyar hankali.
Haka kuma, ya yi addu’ar Allah ya saka wa Sarkin Kano da alkhairi, ya ƙara masa lafiya da tsawon rai, tare da fatan alheri ga sabon Sarkin Sudan a sabuwar rawar da zai taka.
