Saleh Aliyu
Daga Ibrahim Muhammad Kano
Shugaban Jam’iyyar National Democratic Congress (NDC) na Jihar Kano, Hon. Husaini Isah Mairiga, ya bayyana cewa tsohon ɗan takarar Gwamnan Kano, Alhaji Nasiru Yusuf Gawuna, yana nan daram a cikin jam’iyyar, inda yake neman kujerar Sanatan Kano ta Tsakiya a ƙarƙashin NDC.
Mairiga ya bayyana hakan ne yayin da yake zantawa da manema labarai a Kano, inda ya ce, duk da cewa wasu daga cikin muhimman amintattun Gawuna na siyasa an gan su suna ganawa da Gwamnan Kano tare da shirin komawa jam’iyyar APC, hakan ba yana nufin Gawuna ma zai bar NDC ba.
Ya ce mutanen da ake magana a kansu sun kasance abokan tafiyar siyasar Gawuna tun zamanin tsohuwar jam’iyyar ANPP, inda suka yi aiki tare a mukamai daban-daban da ya rike, har zuwa lokacin da ya tsaya takarar Gwamnan Kano a ƙarƙashin APC.
“Wasu daga cikinsu ’yan Gawuna ne da suka yi siyasa tare da shi har zuwa lokacin da ya fice daga APC ya koma ADC tare da su. Haka ma lokacin da ya koma NDC, sun biyo shi,” in ji Mairiga.
Shugaban NDC na Kano ya ce daga baya wasu daga cikin mutanen sun fara korafin cewa Gawuna ya koma ADC, sannan ya koma NDC ba tare da ya tuntube su ba, tare da cewa ba ya ba su wata makoma a cikin jam’iyyar. Ya ce saboda haka ne aka zauna da su aka tattauna batun, inda aka cimma matsayar cewa za su gana da jagoran siyasar Kano, Dr. Rabiu Musa Kwankwaso, domin a shawo kan matsalar.
“Sai dai tun daga lokacin bai sake ganinsu ba. Abin mamaki yanzu na ga sun fito a hoto suna ganawa da Gwamnan Kano, suna shirin komawa APC,” in ji shi.
Mairiga ya ce yana ganin wataƙila suna da wata bukata a wajen gwamnati ne ya sa suke tunanin komawa APC, yana mai cewa da sun yi haƙuri suka ci gaba da zama a NDC, da yardar Allah, idan jam’iyyar ta samu nasara a zaɓen 2027, za a samar musu da kyakkyawar makoma a cikin jam’iyyar.
