Saleh Aliyu
Daga Ibrahim Muhammad
An ja hankalin hukumomin tsaro da gwamnatin jihar Kano a kan yadda aka lura harkar haya da babura masu ƙafa biyu da ake ce wa ‘yan Achaɓa na dawowa ana yi a cikin ƙwaryar Birnin Kano duk da cewa ba a sanar a hukumance an ɗage dokar hani da aka yi ba a shekarun baya saboda matsalar tsaro.
Malam Sa’idu Adamu ne ya yi wannan jan hankalin da yake zantawa da manema labarai, ya ƙara da cewa a baya ya lura ana ɗan yin hayan babur ɗin Achaɓan jefi-jefi ne a ‘yan keɓantattun wurare da suka haɗa da unguwanni Kurna, Rijiyar Lemo da Bachirawa, su ke ɗaukar fasinjoji su shigar da su lunguna saboda nisa. Daga baya kuma sai ake yi a yankin unguwannin Sabon Gari.
Ya ce yanzu kuma harkar ta Achaɓa tana daɗa ƙarfi ne har ta kai sun soma yin gungu-gungu a wurare suna taruwa musamman a cikin yankunan ƙananan hukumomin Fagge, Dala, Nasarawa da Birnin Kano, yanzu masu Achaɓar suna yawo neman fasinja a cikin gari da rana unguwa-unguwa suna haya har wasu ma suna shigowa da baburan daga wajen jihar Kano su yi.
Sa’idu Adamu ya yi nuni da cewa duk kai wa da kawowa da ake yi na haya da baburan da ya dawo ake yi gadan-gadan a Kano a tsakanin jama’a, ya lura suna yi ne a kan idanun jami’an tsaro, don haka yake ganin in aka yi duba da dalilai da suka sa aka hana Achaɓar a baya yin wasarere da aka yi da dawowar Achaɓar, ba ƙaramin sakaci ba ne daga gwamnatin Kano da hukumomin tsaro in aka yi la’akari abubuwa da suka faru a baya da yadda harkar tsaro ke cikin yanayi a yanzu.
Don haka ya ce yana kira ga hukumomin tsaro da gwamnatin jihar Kano ta duba wannan lamari na neman dawowar Achaɓa ta ɗauki mataki da ya kamata ko da ba za a hana ba, ya zama an san masu yi ana kula da su domin kar sai abu ya yi ƙarfi sosai ko wani abu mara daɗi ya auku (Allah ya kiyaye), kar a zo a yi fargar Jaji.
Gazali Haruna
