Saleh Aliyu
Daga Ibrahim Muhammad, Kano
Jigo a tsarin NDC Kwankwasiyya a jihar Kano, Ambasada Hon. Yusuf Darma, ya yi kira ga al’ummar jihar Kano da Najeriya baki ɗaya da su guji yarda jam’iyyar APC ta yaudare su ta hanyar raba musu kayan abinci, kuɗi da babura domin samun goyon bayansu a zaɓen 2027.
Hon. Darma ya bayyana cewa jam’iyyar APC mai mulki ta gaza wajen inganta rayuwar al’umma da tabbatar da tsaro, yana mai cewa hakan ya jefa jama’a cikin ƙunci da talauci. Ya ce a yanzu jam’iyyar ta koma raba kuɗi da babura da sunan tallafi, wanda ya ce ana amfani da shi wajen jan hankalin talakawa domin su sake zaɓe ta a zaɓen da ke tafe.
Ya ce ya kamata al’umma su kare ‘yancinsu na zaɓe tare da tabbatar da cewa sun zaɓi shugabannin da za su kyautata rayuwarsu, su inganta tsaro da zaman lafiya.
“Ya kamata al’umma su kare ‘yancinsu, su tsaya su tabbatar sun zaɓi shugabannin da za su kyautata rayuwarsu da inganta tsaro da zaman lafiya. Domin duk abin da za a ba ka, idan ka zaɓi abin da zai ƙara jefa al’umma cikin ƙunci, rayuwa kai ma za ta shafe ka,” in ji shi.
Ambasada Hon. Yusuf Darma ya kuma yi kira ga al’ummar ƙasar nan da su zaɓi ‘yan takarar jam’iyyar NDC, ciki har da Obi da Kwankwaso, a zaɓen 2027, yana mai cewa ‘yan takarar jam’iyyar mutane ne jajirtattu kuma masu kishin ci gaban al’umma.
A matakin jihar Kano kuwa, ya bayyana tsohon Mataimakin Gwamnan Jihar Kano, Kwamared Aminu Abdussalam Gwarzo, a matsayin ɗan takarar gwamna na NDC Kwankwasiyya, yana mai cewa mutum ne mai gaskiya da riƙon amana, wanda ya ce yana da kyakkyawan tarihin siyasa tun daga tushe da kuma kishin ci gaban al’umma.
Darma ya yi kira ga al’ummar Kano da su mara wa Kwamared Aminu Abdussalam Gwarzo baya, domin, a cewarsa, hakan zai taimaka wajen kawo sauyin siyasa a jihar tare da kawar da gwamnatin da ya zarga da cin amanar al’ummar Kano ta hanyar haɗa kai da jam’iyyar da ke mulki a ƙasa.
