Saleh Aliyu
Daga Ibrahim Muhammad
Kwamitin ‘yan majalisar Dattawa mai kula da Hukumar Bunƙasa Cigaban Arewa maso Yamma ƙarƙashin jagorancin Sanata Babangida Adamu, sun ziyarci mazaunin Hukumar da ke jihar Kano bayan watanni shida da kafa ta.
A lokacin ziyarar, Sanata Babangida Husaini ya yaba da yadda ya ga aikin ke tafiya, tare da cewa za su riƙa zuwa ziyarar lokaci zuwa lokaci don ganin al’ummar yankin sun ci gajiyar Hukumar.
Ya ƙara da nuna gamsuwa kan gwadabe da aka biyo da za a kai ga biyan buƙata da ake sa rai na tabbatar da cin moriyar Hukumar ga al’ummar Arewa maso Yamma.
Sanata Babangida Husaini ya gode wa shugaban ƙasa Asiwaju Bola Ahmad Tunibu bisa amincewa da ƙirƙirar Hukumar, tare da gode wa mataimakin shugaban Majalisar Dattawa, Sanata Barau .I Jibrin da shi ne ya fitar da ƙudirin tun da fari, ya yi ƙoƙari matuƙa wajen tabbatar da Hukumar, ya kuma yaba wa gwamnatin jihar Kano da ta ba da sabbin motoci da wuri da za a gina ofishin dindindin na Hukumar.
A nasa ɓangaren shugaban Hukumar Bunƙasa Cigaban Arewa Maso Yamma, Farfesa Shehu Abdallah Ma’aji ya bayyana jin daɗinsa bisa ziyarar da kwamitin Majalisar Dattawan ƙarƙashin Sanata Babangida Husaini suka kawo a manyan gine ginensu guda biyu wanda Alhaji Abdussamad Isyaka Rabi’u ne ya ba su da kuma shugaban Jami’ar Maryam Abacha Farfesa Adamu Gwarzo suka bayar, kuma aikin na tafiya kan tsarin da aka tsara a kai, kuma sun yaba.
Shugaban Hukumar Farfesa Shehu Abdallah Ma’aji ya gode wa Gwamnan jihar Kano, Alhaji Abba Kabir Yusuf bisa katafaren fili hekta biyu da ya ba iwa Hukumar domin gina mazauninta na dindindin.
Farfesa Shehu Abdallah ma’aji ya yi kira ga dukkan masu kishin cigaban Arewa da cewa an ba su ƙalubale a kan Kudu maso Kudu, Kudu maso Yamma da sauran shiyyoyi. Don haka su tashi su ba da gudunmawa don cimma nasara a kai.
Gazali Haruna
