Saleh Aliyu
Daga Ibrahim Muhammad, Kano
Al’ummar Jihar Kano na yaba wa Hukumar Kula da Zirga-zirgar Ababen Hawa ta Jihar Kano (KAROTA) bisa ƙoƙarin da take yi wajen tabbatar da bin dokokin hanya da daidaita zirga-zirgar ababen hawa a cikin birnin Kano.
Wasu daga cikin jama’a sun ce idan ba don ƙoƙarin Hukumar ba, da matsalar rashin bin dokokin hanya, musamman wajen daidaita sahun ababen hawa da motocin haya, za ta ƙara ta’azzara.
Sai dai duk da wannan ƙoƙari, wasu daga cikin jama’ar sun koka kan yadda wasu jami’an KAROTA ke hulɗa da su, inda suka ce hakan na haifar da cece-kuce da ƙorafe-ƙorafe a wuraren da jami’an ke gudanar da aikinsu.
Muhammad Isyaku, ɗaya daga cikin mutanen da suka yi magana kan lamarin, ya ce ana iya rage yawan saɓanin da ke faruwa tsakanin jami’an KAROTA da masu ababen hawa ta hanyar amfani da hikima, mutuntaka da kyakkyawar mu’amala.
Ya ce idan jami’i ya kama wani da laifin karya dokar hanya, ya kamata ya sanar da shi laifin cikin mutunci tare da bayyana masa kuskurensa, maimakon yin magana ko mu’amala da shi ta hanyar da za ta iya fusata shi.
Ya ƙara da cewa wannan babban nauyi ne da ya kamata shugabannin Hukumar su riƙa ba jami’anta horo da nasiha akai-akai kan muhimmancin kyautata mu’amala da jama’a, ko da kuwa an kama mutum da laifin karya dokar hanya.
A cewarsa, irin wannan kyakkyawar mu’amala za ta taimaka wajen rage saɓani tsakanin jami’an Hukumar da jama’a, tare da ƙara fahimtar juna a lokacin gudanar da aikin tabbatar da bin dokokin hanya.
Misali, wani lokaci an samu rashin fahimta yayin da jami’an suka nemi wata mata da ke zaune a gaban motar mijinta ta fito daga cikin motar ba tare da, a cewar waɗanda suka shaida lamarin, an yi mata bayani cikin yanayin da ya dace ba. Haka kuma, an ce ba a fara sanar da direban motar, wanda shi ne mijinta, laifin da ake zarginsa da aikatawa ba.
Wannan ne ya sa direban ya yi turjiya, lamarin da ya jawo hankalin jama’ar da ke wurin. Daga bisani lamarin ya kusa rikiɗewa zuwa rikici sakamakon yadda wasu daga cikin mutanen wurin suka fusata da abin da jami’an suka yi.
Haka kuma, wasu daga cikin mutanen da ke gudanar da harkokinsu a ƙarƙashin gada da shataletalen da ke kusa da ofishin ‘yan sanda na Fagge, sun nuna damuwarsu kan yadda wasu jami’an KAROTA ke gudanar da aikinsu a wajen.
Sun ce wurin na da yawan ababen hawa da masu buƙatar taimakon jami’an wajen tsallaka hanya, musamman mata da yara, amma a wasu lokuta jami’an kan fi mayar da hankali wajen tsayar da ababen hawa domin duba laifukan hanya ko karɓar abin da ake buƙata daga masu ababen hawan.
Wasu daga cikin jama’ar sun kwatanta jami’an KAROTA da sauran jami’an tsaro da ke gudanar da ayyukan kula da zirga-zirga a kan tituna, kamar ‘yan sanda da Hukumar Kiyaye Haɗurra ta Ƙasa (FRSC).
Sun ce ya kamata jami’an KAROTA su ƙara ƙwarewa wajen mu’amala da jama’a, domin rage yawan cece-kuce da ake samu a lokacin gudanar da ayyukansu.
Wasu daga cikin mutanen da aka tuntuɓa sun ce babbar matsalar da ke haifar da yawan hayaniya da cece-kuce tsakanin jama’a da jami’an KAROTA ita ce rashin kyakkyawar mu’amala da kuma yadda wasu jami’an ke kama masu ababen hawa ba tare da bayyana musu laifin da suka aikata yadda ya kamata ba.
Sun buƙaci shugabannin Hukumar da su riƙa yi wa jami’ansu gargaɗi, nasiha da jan hankalinsu kan muhimmancin mutunta jama’a da kyautata mu’amala, domin tabbatar da cewa aikin tabbatar da bin dokokin hanya bai zama sanadin rikici tsakanin jami’ai da al’umma ba.
Gazali Haruna
