Saleh Aliyu
Daga Ibrahim Muhammad Kano
Wani mamba a ƙungiyar tsofaffin ɗalibai ta KASSOSA, Kwamared Awaisu Nasir Wali (Walin Gafasa), ya bayyana cewa an samu gagarumin cigaba a harkokin shugabancin ƙungiyar ƙarƙashin jagorancin Alhaji Balarabe Nuhu Jalla Ɗanbatta, sai dai ya jaddada buƙatar yin gyara a wasu muƙaman shugabanci.
Walin Gafasa ya bayyana hakan ne yayin da yake tsokaci kan taron ƙarshen shekara da ƙungiyar ta gudanar a jami’ar Bayero University Kano, inda ya ce taron ya gudana yadda ya kamata, kuma ya ƙayatar matuƙa, kamar yadda aka saba gudanarwa duk shekara.
Ya ce taron ya samu armashi sosai, inda tsofaffin ɗalibai suka halarta daga sassa daban-daban na ƙasar nan da ma ƙasashen waje.
Ya ƙara da cewa har da waɗanda ke riƙe da manyan muƙamai a fannoni daban-daban sun halarci taron, inda aka bayar da gudummawa tare da ƙarfafa zumunci a tsakanin mambobin ƙungiyar.
A cewarsa, wannan taro shi ne na ƙarshe a wannan shekara a zangon shugabancin da ake ciki, inda ya bayyana cewa, idan Allah Ya kai su, za a gudanar da taro na gaba a shekarar 2026, wanda a cikinsa ne za a sake gudanar da zaɓen sabbin shugabannin ƙungiyar.
Walin Gafasa ya yaba wa shugabancin yanzu ƙarƙashin jagorancin Alhaji Balarabe Nuhu Jalla Ɗanbatta bisa ƙoƙarin da suke yi wajen tafiyar da harkokin ƙungiyar, tare da ɓullo da tsare-tsare masu amfani da kuma samar da mambobi masu karsashi, kishin ƙungiyar da son cigabanta.
Sai dai ya yi nuni da cewa, duk da cewa babu wata matsala da ake alaƙantawa da mataimakin shugaban ƙungiyar, sakatare da wasu muƙamai, akwai wasu a cikin ƙunshin shugabancin da ake zargin su da aikata abubuwan da ba su dace ba, lamarin da ke jawo ƙorafe-ƙorafe daga mambobin ƙungiyar.
Ya ce irin waɗannan ɗabi’u na son rai, handama da babakere na rage kimar ƙungiyar a idanun ‘ya’yanta da ma abokan hulɗa da ke halartar tarurrukanta, lamarin da ke iya ɓata mata suna da martaba.
Walin Gafasa ya ce a matsayinsu na matasa a cikin ƙungiyar, za su yi duk mai yiwuwa domin ganin an kawar da dukkan mutanen da ke ƙoƙarin raunana ƙarfin da aka gina ƙungiyar a kai.
Ya ƙara da cewa za su yi aiki tuƙuru a zaɓen da ke tafe domin sauya irin waɗannan shugabanni masu halaye da ba su dace da tafiyar da ƙungiyar ba.
A ƙarshe, Kwamared Awaisu Nasir Wali (Walin Gafasa) ya bayyana cewa duk wanda ya riƙe muƙami a zanguna daban-daban, amma bai iya magance matsalolin da suka taso ko ya ƙara gina abin da aka soma ba, ya dace a sauya shi domin kare kimar ƙungiyar.
Ya jaddada cewa da yardar Allah za a samu gyara domin ci gaban KASSOSA.
