Saleh Aliyu
Daga Ibrahim Muhammad, Kano
Shugaban Gamayyar Ƙungiyoyin Kasuwar Singa, Barista Junaid Muhammad Zakari, ya yi kira ga al’ummar Jihar Kano da su yi amfani da damar da aka samar ta sayen hannun jarin Matatar Man Ɗangote.
Barista Junaid, wanda kuma shi ne Shugaban Dandalin Shugabannin Kasuwannin Jihar Kano, ya bayyana ƙaddamar da sayar da hannun jarin da aka gudanar a Kano a matsayin wani mataki na kusantar da wannan dama ga jama’a.
Ya ce mutum na iya mallakar hannun jari a matatar da Naira 5,250 kacal, yana mai cewa wannan dama ce da aka samar domin bai wa ’yan Najeriya damar kasancewa cikin masu mallakar hannun jarin matatar.
Ya bayyana cewa an wayar da kan jama’a kan muhimmancin sayen hannun jarin, musamman ta fuskar tattalin arziƙi da bunƙasa dukiya, tare da bayyana cewa an kuma tabbatar da ingancinsa ta fuskar addini.
Barista Junaid ya ce, duk da cewa wasu na ganin farashin hannun jarin ya yi ƙasa, akwai fatan waɗanda suka yi amfani da damar, daga Naira 5,250 zuwa sama, za su samu damar bunƙasa dukiyarsu nan gaba.
Ya ƙara da cewa an sauƙaƙa tsarin sayen hannun jarin, inda mutum zai iya gudanar da aikin ta bankuna tare da amfani da lambar BVN.
Barista Junaid Muhammad Zakari ya kuma yi kira ga ’yan kasuwa da su taimaka wa masu ƙaramin ƙarfi da ke aiki tare da su wajen samun hannun jarin, domin su ma su amfana da damar da aka samar.
