Saleh Aliyu
Daga Ibrahim Muhammad Kano
A ƙoƙarinsa na tallafa wa ‘ya’yan jam’iyyar APC a jihar Kano daga tushe, ƙaramin Ministan Gidaje, Hon. Yusuf Abdullahi Ata ya raba wa tsofaffin shugabannin ƙananan hukumomi, mataimakansu da kansiloli zaɓaɓɓu da masu gafaka na ƙananan hukumomi 44 tallafi.
An yi rabon tallafin ne a ranar Litinin a babban ɗakin taro na Sakatariyar Gwamnatin Tarayya da ke kan titin Katsina a jihar Kano.
Sai dai rabon ya bar baya da ƙura sakamakon wasu daga tsofaffin kansilolin da masu ba da shawara sun koka da rashin samun tallafin bayan sun baro ƙananan hukuminsu na nesa.
Wasu kansilolin sun shaida mana sun zo ne a matsayin wakilci na raguwar kansilolin daga ƙananan hukumominsu, amma sai aka ce wani ya karɓi nasu.
Haka su ma masu ba da shawarar an sami wannan matsalar ta wasu sun karɓi na wasu.
Wani tsohon shugaban kansilolin da ya zo daga wata ƙaramar hukumar ya ce, an soma rabon tallafi kuɗin cikin tsari da yanayi mai kyau, amma daga baya da aka zo kan na kansiloli ne tsarin ya karye, abin da wasu ke ganin kamar da gangan aka yi domin a rikita tsarin.
Sai dai bayan jan lokaci ana tinja-tinja na yadda za a ba da kuɗin tun daga ɗakin da ake taron, sai da aka fito waje aka kusa zagaye harabar bene na ɗaya da aka yi taron don ganin yadda za a shawo kan lamarin.
A ƙarshe an zartar da bai wa kowane mutumin da ya zo wajen.
Sai dai wani tsohon Kansila da shi ma ya zo a matsayin wakilci, zai karɓi na tsofaffin kansilolin yankin su ya ce, shi bai karɓa ba, abin da ya sa kuma bai karɓi kuɗin ba shi ne, ya je taron ne a wakilcin tsofaffin kansilloli na yankinsu, amma sai aka ce shi kaɗai za a bai wa, don haka bai karɓa ba.
Mun yi ƙoƙarin ji daga masu ruwa da tsaki na masu rabon tallafin da suka haɗa da tsohon shugaban ƙaramar hukumar Birnin Kano, tsohon dan majalisar jiha, Hon. Salisu Maje Ahmad Gwangwazo da tsohon shugaban ƙaramar hukumar Fagge, Hon. Ibrahim Abdullahi Shehi, waɗanda suna daga cikin manyan hadiman Ministan, amma ba wanda ya amince muka yi magana da shi.
Wani daga cikin tawagar masu rabon a gefe ya shaida mana cewa, rabon da kyakkyawan manufa aka yi da tsarin da kowa zai samu, amma sai aka sami karyewar tsarin.
Ya ce, duk wanda sunansa ke cikin jerin sunayen tsofaffin kansilolin da masu ba da shawara da shugabannin ƙananan hukumomi da mataimakansu na gwamnatin APC da ta gabata za su samu, ba wanda zai rasa.
A yayin taron, Shugaban Ata Social Media da Maliya Media Reporter na ƙaramar hukumar Gabasawa, Buhari Muhammad Karmami, ya karrama Ministan.
Ya ce sun karrama ƙaramin Ministan Gidaje, Hon. Yusuf Abdullahi Ata ne saboda tunda ake ministoci daga Kano ba a sami kamar sa a wajen taimakon jama’a ba.
Muhammad Karmami ya ce, Hon. Ata ya riƙe Ma’aikatar da shugaban ƙasa Bola Ahmad Tinubu ya ba shi da kulawa da yin aiki tuƙuru, tare da kawo cigaba.
