Saleh Aliyu
Daga Ibrahim Muhammad, Kano
Mai Martaba Sarkin Kano, Khalifa Muhammad Sunusi II, ya naɗa sabbin masu sarauta a fadarsa ranar Juma’a, ciki har da Alhaji Sa’ad Ibrahim Ahmad wanda aka naɗa a matsayin Mayanan Kano.
Bikin naɗin ya samu halartar ɗimbin jama’a da suka haɗa da ’yan uwa, abokan arziƙi da sauran al’umma daga sassa daban-daban na Jihar Kano da ma wajenta.
Masu halartar sun taya sabon Mayanan Kano murna tare da yi masa addu’ar Allah Ya ba shi ikon sauke nauyin da aka ɗora masa.
Da take magana bayan bikin, mai ɗakin Mayanan Kano, Dakta Asma’u Baba Ɗanbaffa, ƙwararriyar likitar yara a Asibitin Tarayya da ke Abuja, ta gode wa Mai Martaba Sarkin Kano bisa wannan karamci da amincewar da ya yi wajen ba wa mijinta sarautar.
Ta bayyana mijinta a matsayin mutum mai kyawawan halaye, mai taimakon al’umma da tausayin marasa ƙarfi.
“Ba ya nuna bambanci tsakanin talaka da mai arziki. Yana mu’amala da ma’aikatansa cikin mutuntawa, girmamawa da amana. Har ma suna cin abinci tare ba tare da nuna isa ko fifiko ba,” in ji ta.
Dakta Asma’u ta ƙara da cewa Mayanan Kano ya kasance mai taimaka wa masu buƙata gwargwadon ikonsa.
“Duk wanda ya zo gare shi da wata buƙata, yana ƙoƙarin ganin ya samu tallafin da zai rage masa wahala,” ta ce.
Ta jaddada goyon bayanta ga mijinta wajen sauke nauyin da Masarautar Kano ta ɗora masa.
“A matsayina na mai ɗakinsa, ina tare da shi a kowane lokaci kuma ina ƙarfafa masa gwiwa. Na yi farin ciki da wannan naɗi domin mutum ne da ya taso cikin tsarin sarauta kuma yana girmama al’adu da martabar masarauta,” in ji ta.
Ta kuma yi addu’ar Allah Ya ba sabon Mayanan Kano hikima, jagoranci da nasara wajen gudanar da ayyukan da suka rataya a wuyansa.
A wani ɓangare kuma, Dakta Asma’u ta bayyana cewa domin murnar naɗin sarautar, sun gudanar da duba lafiyar yara kyauta tare da wayar da kan iyaye kan muhimmancin rigakafi da hanyoyin kariya daga cututtukan yara a Kofar Fadar Sarki.
Ta ce sun kuma raba magungunan zazzaɓin cizon sauro da sauran magungunan yara kyauta ga waɗanda suka amfana da shirin.
“Za mu ci gaba da gudanar da irin waɗannan ayyukan jin kai domin tallafa wa al’umma da kuma inganta rayuwarsu. A matsayina na mace, zan ci gaba da bai wa mijina duk wani goyon baya da ya dace wajen hidimtawa jama’a,” in ji Dakta Asma’u.
A nasa jawabin, sabon Mayanan Kano, Alhaji Sa’ad Ibrahim Ahmad, ya gode wa Masarautar Kano ƙarƙashin jagorancin Khalifa Muhammad Sunusi II bisa wannan karramawa da ta yi masa da kuma zuriyar Matawalle ta hanyar ba shi wannan sarauta.
Ya ce zai ci gaba da nuna biyayya da girmamawa ga Masarautar Kano, tare da kare martabarta da mutuncinta a kowane lokaci.
Haka kuma, ya gode wa dukkan waɗanda suka halarci bikin da kuma waɗanda suka taya shi murnar wannan naɗi, yana mai addu’ar Allah Ya saka musu da alheri.
