Saleh Aliyu
Daga Ibrahim Muhammad Kano
Injiniya Umar Faruk, ɗan aji na shekarar 1992 a Kwalejin Fasaha ta Ungogo, kuma jigo a ƙungiyar tsofaffin ɗaliban makarantar, ya bayyana gamsuwarsa kan yadda ya ga ci gaba mai kyau a taron ƙungiyar na ƙarshen wannan shekara, idan aka kwatanta da na bara.
Ya ce taron na wannan shekara ya zo da sauye-sauye masu yawa, inda aka samu gyare-gyare a sassa daban-daban na makarantar, sakamakon shigowar gwamnati da kuma fara aiwatar da ayyukan ci gaba a fannin fasaha da koyarwa.
Injiniya Umar Faruk ya yaba da jajircewar tsofaffin ɗalibai daga ajujuwa daban-daban, inda ya ce sun dage wajen bayar da gudunmawa ta hanyoyi iri-iri, lamarin da ke ƙara haɓaka cigaban makarantar da kuma ƙarfafa haɗin kai a tsakanin ‘yan ƙungiyar.
Ya yi tsokaci da cewa, duk da ƙoƙarin da ake yi wajen bunƙasa harkar ilimin fasaha a wannan lokaci, yankin Arewa ya ɗan fuskanci koma baya a baya.
Sai dai ya nuna ƙwarin gwiwa cewa nan gaba, sannu a hankali, za a riƙa samun ci gaba mai dorewa a fannin fasaha, musamman ta hanyar samar da sana’o’in dogaro da kai.
A cewarsa, gwamnati ta fahimci cewa babu wani fanni da ya fi dacewa a ba da goyon baya kamar na fasaha da ƙere-ƙere, domin shi ne ginshiƙin samar da ayyukan yi.
Wannan, in ji shi, zai taimaka wa gwamnati wajen rage nauyin rashin aikin yi da kuma matsalolin tsaro da hakan ke haifarwa.
Injiniya Umar Faruk ya kuma yaba da ƙoƙarin da ake yi na haɗa dukkan rassan ƙungiyoyin tsofaffin ɗaliban makarantun fasaha na jihar Kano ƙarƙashin inuwa guda, domin samar da sauƙin aiki tare, tallafawa juna, da kuma bunƙasa cigaban makarantun fasaha a jihar baki ɗaya.
